ខេត្តប៉ៃលិន ៖ ស្រ្តីវ័យក្មេងម្នាក់ដោយសារចាញ់បោកឈ្មួញកណ្តាល និងម្ចាស់ដីពីរឿងទិញលក់ដីមួយកន្លែង កាលពីជាង ៤ខែ កន្លងទៅនេះ តែដោយមិនអាចទៅពឹងអ្នកណាឱ្យជួយបាន ក៏ដាច់ចិត្តរត់ទៅឱ្យលោកអភិបាលខេត្តជួយអន្តរាគមន៍ កាលពីវេលាម៉ោង ១១ និង៣០នាទី ព្រឹកថ្ងៃទី២៥ ឧសភា ២០១៣ ដោយនាងមិនចង់បានអ្វីក្រៅពីលុយថ្ងៃកក់ដីចំនួន ២.៥០០ដុល្លារ នោះមកវិញ ដើម្បីយកទៅសងថ្លៃចងការលុយគេ ។
ស្រ្តីដែលចាញ់បោកគេមានឈ្មោះ មន រតនា អាយុ ២៤ឆ្នាំ មានប្តីឈ្មោះ វ៉ា រិទ្ធ អាយុ ២៥ឆ្នាំ មានកូនស្រី ២នាក់ រស់នៅភូមិក្បាលព្រលាន សង្កាត់អូរតាវ៉ៅ ក្រុងប៉ៃលិន ។ ចំណែកម្ចាស់ដីឈ្មោះ វ៉ាន់ ផុន អាយុ ៣៧ឆ្នាំ ជាមន្រ្តីយោធា មានប្រពន្ធឈ្មោះ សាយ ស្រីនាត អាយុ ២២ឆ្នាំ រស់នៅភូមិភ្នំដំបង សង្កាត់អូរតាវ៉ៅ ក្រុងប៉ៃលិន ។
តាមស្រ្តីម្នាក់ឈ្មោះ ពៅ មុំ អាយុ ៥១ឆ្នាំ ត្រូវជាម្តាយធំស្រ្តីរងគ្រោះ បានឱ្យដឹងថា កាលពីថ្ងៃទី០៤ មករា ២០១៣ កន្លងទៅនេះ មានបុរសជាឈ្មួញកណ្តាលម្នាក់ឈ្មោះ ទូច ប្រុស អាយុប្រហែល ៤៥ឆ្នាំ រស់នៅភូមិថ្មី សង្កាត់ប៉ៃលិន ក្រុងប៉ៃលិន បានស្គាល់គ្នា និងបានលួងលោមក្មួយស្រីថា មានបុរសម្នាក់ឈ្មោះ វ៉ាន់ ផុន ជាទាហានចង់លក់ដីចម្ការទាំងអស់តម្លៃ ៦.៨០០ដុល្លារ (មិនបានថាលក់ចំនួន ៦ហិកតា តម្លៃ ៦.៨០០ ដុល្លារ ឬលក់ក្នុង ១ហិកតា តម្លៃ ៦.៨០០ដុល្លារ នោះទេ)។
ក្រោយមកដោយឭថាគេលក់ទាំងអស់មានតម្លៃប៉ុណ្ណឹង ក៏ទៅជួបម្ចាស់ដីនិយាយសុំតថ្លៃចុះត្រឹម ៦.៥០០ដុល្លារ តែម្ចាស់ដីថាដាច់ត្រឹម ៦.៨០០ដុល្លារ ទើបនាងយល់ព្រម រួចរត់ទៅចងការលុយគេចំនួន ២.៥០០ដុល្លារ យកទៅកក់ឱ្យម្ចាស់ដី កាលពីថ្ងៃទី០៧ មករា ២០១៣ ។ ស្រាប់តែនៅថ្ងៃទី១៣ មករា ក្រោយពេលប្រគល់លុយបង្រ្គប់រួច ម្ចាស់ដីឈ្មោះ វ៉ាន់ ផុន បាននិយាយក្រឡាស់ថា គាត់មិនមែនលក់ដីទាំងអស់ចំនួន ៦.៨០០ដុល្លារ ទេគឺលក់ក្នុង ១ហិកតា តម្លៃ ៦.៨០០ដុល្លារ ។
គ្រាន់តែឭម្ចាស់ដីនិយាយយ៉ាងនេះ នាងក៏ស្រងាកចិត្តរួចសុំលុយម្ចាស់ដីមកវិញ ព្រោះគ្មានលទ្ធភាពទិញទាំងអស់ តែម្ចាស់ដីសងត្រឹមតែលុយបង្រ្គប់ប៉ុណ្ណោះ ចំណែកលុយកក់នោះ ម្ចាស់ដីអត់ឱ្យមកវិញទេ ដោយនិយាយថាចង់ទៅប្តឹងឯណាក៏ប្តឹងទៅ ទើបនាងរត់ឱ្យលោកអភិបាលខេត្តជួយអន្តរាគមន៍ ៕ប្រភព:កោះសន្តិភាព
0 comments:
Post a Comment