ថ្ងៃអាទិត្យ ទី៥ ខែឧសភា ឆ្នាំ២០១៣ ម៉ោង ១០:០២
រាជធានីភ្នំពេញ ៖ យប់ថ្ងៃទី៤ ឧសភា ២០១៣ ក្រសួងការងារ និងបណ្តុះបណ្តាលវិជ្ជាជីវៈសហការគ្នាជាមួយក្រុមប្រឹក្សាសហជីពជាតិបានរៀបចំពិធីពិសារបាយសាមគ្គី រាំលេងកម្សាន្ត ជាមួយថ្នាក់ដឹកនាំសហជីពមូលដ្ឋានដែលមកពីបណ្តារោងចក្រ និងជ្រើសរើសកញ្ញាឯកចំនួន១០នាក់ ដើម្បីអបអរសាទរខួបលើកទី១២៧ នៃទិវាពលកម្មអន្តរជាតិ១ឧសភា ។
ពិធីនេះបានរៀបចំឡើងនៅភោជនីយដ្ឋានកាដូ ស្ថិតនៅតាមបណ្តោយផ្លូវជាតិលេខ៦ ក្នុងសង្កាត់ជ្រោចង្វា ខណ្ឌឫស្សីកែវ ក្រោមអធិបតីភាពលោកបណ្ឌិត ហ៊ុន ម៉ាណែត នាយរងសេនាធិការចម្រុះនៃកងយោធពលខេមរភូមិន្ទ និងជាមេបញ្ជាការរងកងទ័ពជើងគោក ព្រមទាំងមានការចូលរួមពីថ្នាក់ដឹកនាំសហជីពមូលដ្ឋានប្រមាណ៩០០នាក់ និងចលនាយុវជនចុះជួយខេត្តកំពង់ចាម យុវជនក្រសួងការងារ និងបណ្តុះបណ្តាលវិជ្ជាជីវៈប្រមាណជាង២០០នាក់ទៀត ។
លោកបណ្ឌិត ហ៊ុន ម៉ាណែត ក៏បានពាំនាំនូវការផ្តាំផ្ញើសួរសុខទុក្ខពីសំណាក់សម្តេចអគ្គមហាសេនាបតីតេជោ ហ៊ុន សែន និងលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលតែងតែនឹករលឹក និងគិតគូរយ៉ាងខ្លាំងចំពោះបងប្អូនកម្មករ កម្មការិនីនៅទូទាំងប្រទេស ។ ថ្ងៃនេះសូមចូលរួមអបអរសាទរនូវការរៀបចំកម្មវិធីសប្បាយនានា ដើម្បីរំលឹកខួបលើកទី១២៧ នៃទិវាពលកម្មអន្តរជាតិ១ឧសភា ក៏ដូចជាការអបអរសាទរចំពោះការទទួលបានប្រាក់បៀវត្សអប្បបរមារបស់បងប្អូនកម្មករ កម្មការិនីក្នុងវិស័យកាត់ដេរ និងដេរស្បែកជើងដែលទទួលបានក្នុង១ខែ៨០ដុល្លារ ដោយគិតចាប់ពីថ្ងៃទី១ ឧសភា នេះតទៅ ៕ប្រភព:កោះសន្តិភព
0 comments:
Post a Comment