ថ្ងៃសៅរ៏ ទី៤ ខែឧសភា ឆ្នាំ២០១៣ ម៉ោង ០៧:០០
ខេត្តប៉ៃលិន ៖ គ្រោះថ្នាក់ចរាចរណ៍ដ៏គួរឱ្យរន្ធត់មួយ បណ្តាលឱ្យស្លាប់មនុស្ស២នាក់ និងរបួសធ្ងន់២នាក់ ដោយសាររថយន្តកំពុងតែបើកស្រាប់តែបែកកង់មុខផ្នែកខាងឆ្វេងចំផ្លូវចុះចំណោតរេចង្កូតធ្លាក់ចុះទៅក្នុងអូរស្ពានដែលគ្មានទឹក បណ្តាលឱ្យរថយន្តផ្នែកខាងក្រោយហោះទៅបុកផ្ទុបជញ្ជាំងស្ពាន កាលពីវេលាម៉ោង៣និង១៥នាទីរសៀលថ្ងៃទី២ ឧសភា នៅលើផ្លូវជាតិលេខ៥៧ ស្ថិតក្នុងភូមិអូរតាប្រាង្គ សង្កាត់ប៉ៃលិន ក្រុងប៉ៃលិន ។
ជនរងគ្រោះ១-ឈ្មោះ ជុំ គឹមឈិង ភេទស្រី អាយុ២០ឆ្នាំ ស្លាប់នៅនឹងកន្លែង ។ ២-ឈ្មោះ ជុំ ប៊ុនធា ភេទស្រី អាយុ៣១ឆ្នាំ រងរបួសធ្ងន់ ទាំងពីរនាក់រស់នៅសង្កាត់មិត្តភាព ខណ្ឌ៧មករា រាជធានីភ្នំពេញ ។ ៣-ឈ្មោះ ជួប វិសាល ភេទប្រុស អាយុ២៧ឆ្នាំ រស់នៅភូមិកណ្តាល ឃុំព្រៃខ្លា ស្រុកកោះអណ្តែត ខេត្តតាកែវ ជាមន្ត្រីយោធា រងរបួសធ្ងន់ ជាអ្នកបើកបររថយន្ត និង៤-ឈ្មោះ ម៉ាក ប្រុស ភេទប្រុស អាយុ៣៥ឆ្នាំ ជាគ្រូបង្រៀនរស់នៅភូមិកំពង់ជ្រៃ ឃុំស្មោង ស្រុកទ្រាំង ខេត្តតាកែវ ស្លាប់នៅនឹងកន្លែង ។
តាមប្រភពព័ត៌មានពីសាក្សីនៅកន្លែងកើតហេតុបានរៀបរាប់ឱ្យដឹងថា មុនពេលកើតហេតុ គេឃើញរថយន្តមួយគ្រឿង ម៉ាកកាមរីឆ្លាម ពណ៌ទឹកប្រាក់ ពាក់ស្លាកលេខភ្នំពេញ 2M-6360 ជិះគ្នា៤នាក់ បើកបរក្នុងទិសដៅពីកើតទៅលិចលើផ្លូវជាតិលេខ៥៧ លុះមកដល់កន្លែងកើតហេតុ ស្រាប់តែរថយន្តមួយគ្រឿងនេះ បានបើកវ៉ារថយន្តមួយគ្រឿងទៀត ដែលនៅពីមុខ និងស្ថិតលើចំណុចផ្លូវចុះចំណោត ។ គ្រាន់តែវ៉ាផុតបានបន្តិច ស្រាប់តែរថយន្តមួយគ្រឿងនេះបានផ្ទុះកង់មុខផ្នែកខាងឆ្វេង បណ្តាលឱ្យរេចង្កូតធ្លាក់ចុះទៅក្នុងជម្រៅអូរខាងឆ្វេងដៃ មុខស្ពានអូរតាប្រាង្គដែលបាតស្ពានគ្មានទឹកទេ ។
ពេលដែលធ្លាក់ទៅក្នុងអូរមុខស្ពាននោះ រថយន្តក៏បានក្រឡាប់ជាច្រើនត្រឡប់បោកខ្លួនផ្ទុបនឹងជញ្ជាំងក្រោមស្ពានបែរគូទទៅទល់នឹងជញ្ជាំងស្ទឹង ។ ចំពោះជនរងគ្រោះ២នាក់ដែលស្លាប់ គឺជាអ្នកជិះនៅបាំងក្រោយ ។ ឯ២នាក់ដែលជិះខាងមុខរបួសធ្ងន់ធ្ងរ ។ប្រភពដដែលបន្តទៀតថា អ្នកជិះខាងមុខនិងអ្នកបើកបរបានរងរបួសធ្ងន់ ត្រូវបានរថយន្តដឹកទៅសង្គ្រោះនៅមន្ទីរពេទ្យបង្អែកខេត្ត ។
លោក ហ៊ីង យ៉ាន់ នាយការិយាល័យចរាចរណ៍ផ្លូវគោកខេត្តប៉ៃលិន បានឱ្យដឹងថា ជនរងគ្រោះដែលនៅក្នុងរថយន្តទាំងអស់បានធ្វើដំណើរពីរាជធានីភ្នំពេញមកខេត្តប៉ៃលិន ក្នុងគោលបំណងមកចូលរួមក្នុងពិធីរៀបអាពាហ៍ពិពាហ៍របស់មិត្តភក្តិ ។
លោក ហ៊ីង យ៉ាន់ នាយការិយាល័យចរាចរណ៍ផ្លូវគោកខេត្តប៉ៃលិន បានឱ្យដឹងថា ជនរងគ្រោះដែលនៅក្នុងរថយន្តទាំងអស់បានធ្វើដំណើរពីរាជធានីភ្នំពេញមកខេត្តប៉ៃលិន ក្នុងគោលបំណងមកចូលរួមក្នុងពិធីរៀបអាពាហ៍ពិពាហ៍របស់មិត្តភក្តិ ។
លោក ហ៊ីង យ៉ាន់ បានបន្តទៀតថា ក្រោយពេលកើតហេតុ ជនរងគ្រោះដែលស្លាប់ទាំងពីរនាក់ត្រូវបានសមត្ថកិច្ចខេត្តទាក់ទងទៅក្រុមគ្រួសារសាច់ញាតិដឹកសពត្រឡប់ទៅរាជធានីភ្នំពេញវិញ ដើម្បីធ្វើបុណ្យតាមប្រពៃណី ។ រីឯអ្នករងរបួសសម្រាកព្យាបាលនៅមន្ទីរពេទ្យខេត្ត នៅឡើយ ។ ចំណែករថយន្តបានខូចទាំងស្រុង ព្រមទាំងបែកកង់ទាំងបួនគ្រាប់ ហើយត្រូវបានសមត្ថកិច្ចចរាចរខេត្តស្ទូចយកទៅរក្សាទុកនៅស្នងការដ្ឋាននគរបាលខេត្ត ជាបណ្តោះអាសន្ន រង់ចាំម្ចាស់មកទទួលយកទៅផ្ទះវិញ ៕ប្រភព: កោះសន្តិភាព
0 comments:
Post a Comment