ថ្ងៃអង្គារ ទី១១ ខែមិថុនា ឆ្នាំ២០១៣ ម៉ោង ១៦:០១
យោងតាមទិន្នន័យមួយដែលចេញផ្សាយនៅថ្ងៃអង្គារទី១១មិថុនាបានបង្ហាញថា សេដ្ឋកិច្ចរបស់ប្រទេសជប៉ុនបានកើនឡើងយ៉ាងឆាប់រហ័សជាងការព្យាករនៅក្នុងត្រីមាសទី១ ។ការិយាល័យគណៈរដ្ឋមន្ត្រីបាននិយាយថា កំណើនសេដ្ឋកិច្ចបានឈានដល់៤,១%នៅក្នុងត្រីមាសទី១ពីខែមករាដល់មីនា ពោលគឺលើសពីការព្យាករកាលពីមុនដែលថាបាន៣,៥% ។ តួលេខនេះគឺខ្ពស់ជាងបណ្តាប្រទេសឧស្សាហកម្មនានានៅលើពិភពលោកដែលកំពុងប្រឹងប្រែងជំរុញកំណើនសេដ្ឋកិច្ចរបស់ខ្លួន ។
តួលេខខាងលើត្រូវបានបង្ហាញប៉ុន្មានថ្ងៃ បន្ទាប់ពីលោកនាយករដ្ឋមន្ត្រីសិុនហ្សូ អាបេដាក់ចេញផែនការដែលហៅថា ព្រួញទី៣សម្រាប់សេដ្ឋកិច្ចដែលរួមមានការចំណាយច្រើនរបស់រដ្ឋាភិបាល និងការបន្ធូរបន្ថយរូបិយវត្ថុរបស់ធនាគារកណ្តាល ។កម្មវិធីខាងលើរបស់លោកបានធ្វើឲ្យប្រាក់យ៉េនធ្លាក់ថ្លៃប្រហែល២០%ចាប់តាំងពីខែវិច្ឆិកាមក ហើយត្រឡប់មកវិញបានរុញច្រានឲ្យភាគហ៊ុននៅទីក្រុងតូក្យូឡើងខ្ពស់ ព្រមទាំងផ្តល់ប្រយោជន៍ដល់ក្រុមហ៊ុននាំចេញ ។
មូលនិធិរូបិយវត្ថុអន្តរជាតិ IMF រំពឹងថា សេដ្ឋកិច្ចជប៉ុននឹងកើន១,៦%នៅក្នុងឆ្នាំ២០១៣។ ភាពល្អប្រសើរនេះកើតចេញពីការផ្លាស់ប្តូរខ្ពស់នៅក្នុងការចំណាយមូលធន ដែលជាវិធានការទំនុកចិត្តគន្លឹះក្នុងចំណោមក្រុមហ៊ុនផលិតនៅក្នុងប្រទេសនេះ ។ អតិរេកគណនីចរន្តដែលជាការវាស់វែង ពាណិជ្ជកម្មរបស់ជប៉ុនជាមួយបណ្តាប្រទេស នានាលើពិភពលោកបានកើនឡើងទ្វេដងរហូតដល់៧,៦ពាន់លានដុល្លារបើធៀបនឹងរយៈពេលដូចគ្នាកាលពីឆ្នាំមុន ៕
ប្រភព:កោះសន្តិភាព
ប្លកនេះលយម៉ែន
ReplyDelete